Davao City – Mutunol og P700,000 nga pinansyal nga hinabang ang Davao City sa Northern ug Eastern Samar nga gilampurnas ni Bagyong Ambo.
Naaprubahan atol sa session sa 19th City Council ang pagtugot nga gamiton ang 30% Quick Response Fund sa 5% Calamity fund sa syudad para sa maong ayuda.
Mudawat og tag-P100K ang probinsya sa Northern Samar ug unom ka mga munisipalidad sa Eastern Samar nga mao ang Arteche, Maslog, Dolores, Oras, Jipadpad ug San Policaro nga gipailawom sa State of Calamity.
Sumala ni CDRRMO Head Alfredo Baloran tungod sa hulga sa COVID-19, dili na personal nga mahatod ang ayuda sa Typhoon Ambo victims apan ipadala nalang kini pinaagi sa bangko.
“Makita nato sa ilahang gipadala nga pictures ug sa ilahang mga reports severely affected gyod sila during the typhoon Ambo syempre ang atoang Mayor naluoy pod sa ilaha didto unya naa pa tay gamay hatag ta bisag ra pud atong matabang sa ilaha atleast siguro matagaan pod nato ang mga areas nga hardly hit sa Bagyong Ambo,” segun ni Baloran.
Matud ni Baloran sa pagkakaron aduna pay P80 million nga nahibilin sa Quick Response Fund.
RadyoMaN Aimee Guinita
