Davao City: ‘The Big One’ linog posibleng masinatian

Malampusong gisugdan sa Office of the Civil Defense XI ug Regional Disaster Risk Reduction and Management Council Davao Region, ang duha ka adlaw nga ‘Walk the Fault Activity’ nga gisalmotan usab sa DOST XI, PHIVOLCS Central Office, CDRRMO, Responders, mga Purok Leaders, Opisyal sa Barangay ug mga residente nga gipahigayon sa Barangay Pequeño Gym, kagahapon sa buntag.

Kini ang nahimong assessment ni RDRRMC XI Director Ednar Dayanghirang sa pagsugod sa duha ka adlaw nga ‘Walk the Fault Activity’ kagahapon.

Matud ni Dayanghirang, nakita sa mapa nga gihimo sa PHIVOLCS niadtong 2017, ang Davao City nagbaton og daghang fault line ug gitas-on sa Dacudao-Tamugan fault line nga moabot sa Ulas diin ang Mintal ug Catalunan Pequeño naagian sa taas nga liki sa yuta.

Gisulti ni PHIVOLCS Geologist Jeff Perez nga dili lang ‘The big one’ apan ‘The Bigger One’ kung molihok, ang mga fault-line sa syudad sa Davao, diin ang kaya mamugna niini anaa sa magnitude 8 nga linog ug paigo nang gikusgon aron gubaon ang dakbayan sa Davao.

Gikanayon ni Dayanghirang, human nasayran sa mga residente ang ‘The Bigger One’ gibati og kahadlok ang mga tawo ilabi na kadtong mga balay sa mga subdivision nga anaa sa tungod ang liki sa kayutaan.

Apan sa laing bahin, nagpasalamat ang katawhan sa Mintal ug Pequeño sa Walk the Fault activity kay pinaagi niini na-edukar sila sa sitwasyon sa mga fault line sa syudad ug makapre – para daan ang katawhan sa mitigasyon kabahin sa epekto sa ‘The Bigger One’ nga linog sa dakbayan sa Davao.

RadyoMaN Joel Viray