Atol sa sent off ceremony sa security cluster sa Davao City Police ground kagahapon adlawa, gikumpirma ni Public Safety and Security Command Center Head Angel Sumagaysay ang pagpirmahanay og kasabutan tali ni Davao City Mayor Sebastian “Baste” Duterte ug sa mga representante sa City of Jinjiang Fujian Province of China nga gipahigayon sa Arcadia nga nahimutang sa Quimpo Boulevard ning siyudad gahapon sa buntag.
Kauban misaksi sa paglagdaanay og memorandum of agreement kagahapong adlawa ang pipila ka opisyal sa siyudad sama sa Davao City Investment and Promotion sa pagpanguna ni kanhi 2nd district Councilor April Dayap.
Suma ni Sumagaysay, anaa sa 100 ka representante gikan sa maong siyudad sa Tsina ang miari sa dakbayan aron tintaan ang kasabutan sa duha ka siyudad nga una nang nagka-ilhanay isip managsuong dakbayan sa panahon ni Mayor Inday Sara Duterte nga karon Bise Presidente na pipila ka tuig nang nakalabay.
Nasayran nga ang kasabutan nakasentro sa economic and trade development tali sa duha ka siyodad diin gilauman nga mas midagsa pa ang mga negosyante gikan Tsina dinhi sa siyudad nga siguradong magmugna og dugang trabaho alang sa mga Dabawenyo.
RadyoMaN Joel Viray
