Davao City – Gi-awhag karon sa Davao City Disaster Risk Reduction and Management Council (DCDRRMC) ang katawhan nga aktibong mopartisipar sa himuong 3rd city-wide full scale earthquake and tsunami exercise karong July 26, 2019, adlawng Biyernes.
Sa interbyu sa DXDC RMN Davao kang Roger Ingente, operator sa Disaster Operation Center sa Davao City, gisaysay niini nga bililhon ang pagpartisipar sa publiko labi na ang mga kabarangayan, tulunghaan, mga establisemento, government offices ug uban pa aron magbaton og igong kahibalo sa pagpangandam panahon sa dili matagna nga kalamidad.
“Unta ang tanan mag-participate para kung halimbawa naay mga panghitabo dinhi sa Davao, makabalo ta kung unsay atong angay’ng buhaton nga mahilayo ta sa mga kadaut,” tataw ni Ingente.
Nasayran nga gawas sa Davao, magpahigayon usab ang syudad sa Mati sa Davao Oriental og city-wide earthquake drill sa maong adlaw sa pagpangandam labi na sa linog diin nasayran nga nagbaton usab ang lugar sa Mati fault diin gitay-og kini sa 8.3 magnitude nga linog niadtong tuig 1924.
RadyoMaN Kirby Manzon
