Davao City – Gibutyag sa Davao City COVID-19 Task Force (TF) nga dako og nahimo ang vaccination rollout sa pag-ubos sa kaso sa Coronavirus Disease 2019 (COVID-19).
Matud ni Dr. Michelle Schlosser, Spokesperson sa Davao City COVID-19 TF (sa interbyu sa city-owned radio), sagad nagataas ang kaso sa COVID-19 kung adunay bag-ong variant apan kini nakontrola sa padayong estratehiya sa City Government of Davao nga mapaubos ang COVID-19 cases.
Ubay-ubay na usab sa Davaoeño ang nagpabakuna nga dakong tabang aron malikayan ang risgo sa epekto sa makatakod nga balatian.
“Ang pagpabakuna gyud ang isa sa dako kaayo nga rason nganong nagababa pud atoang cases, because kung nabakunahan ka, less likely gyud ka nga ma-infect sa virus,” matud ni Schlosser.
Sa pagkakaron, nagpadayon ang mobile vaccination ug door-to-door vaccination sa lokal nga panggamhanan.
Base sa November 4, 2021, anaa na lamang sa 35 new COVID-19 cases ang natala sa syudad sa Davao ug 86 ang bag-ong kaso sa entero Davao Region, mas ubos kung itandi sa mga milabay nga bulan ug semana.
RadyoMaN Kirby Manzon
