Davao City – Subay sa gipakusgan nga anti-criminality and terrorism campaign ug Oplan Kalinaw sa Davao City Police Office (DCPO) mibagsak og maayo ang kriminalidad sa siyudad sa Dabaw.
Kini maoy gipadayag karon ni DCPO Spokesperson Police Senior Inspector Maria Teresita Gaspan nga ubos kaayo ang krimen nga nagapanghitabo sa dakbayan sa Dabaw itandi sa miaging mga katuigan.
Partikular mikunhod ang street crime sa nanglabay nga mga bulan kini subay sa assessment diin tagsa ra dunay matala nga tulis, labni, pagpatay, lungkab, ug daghan pang uban.
Ug kini nagpasabot nga epektibo ang istratihiya sa kapulisan sa kampanya kontra kriminalidad kung asa nasuta usab ang taas nga crime solution sa mga nahitabong krimen sa tibuok dakbayan.
Segun ni Gaspan, ila usab gipakusgan ang Oplan Kalinaw matag semana kung asa tumong ani mao ang pag-profile sa mga tawo nga walay record ilabi na sa kadtong bag-ong sampa sa barangay.
Daghan na matud pa sa mga pinangita sa balaod kansang nag-atubang og mga kaso ug dunay pending orden de aresto ang nadakpan sa mga otoridad.
Dugang sa tigpamaba sa kapulisan nga aktibo usab ang mga tinugyanan sa balaod sa pagpakusog sa adbokasiya sa kaayohan sa mga kababainhan ug labaw na sa kadtong biktima sa lugos.
Mapasalamaton ang opisyal sa suporta sa katawhan sanglit kun walay kooperasyon ang publiko hayan dili magmalampuson ang mga otoridad sa ilang gipakigbisugan kontra kriminalidad ug uban pa.
RadyoMaN Joel Viray
