Davao City – Gikalipay pagmaayo ni Governor Jayvee Tyron Uy sa Compostela Valley ang pagpirma ni Pangulong Rodrigo Roa Duterte sa Republic Act 11297 o ang balaod nga mag-usab sa pangalan sa Compostela Valley Province padulong sa Davao de Oro.
Sa pakighinabi sa DXDC RMN Davao kang Uy, nagpaabot kini sa iyang pagpasalamat sa presidente sa hingpit niining paglagda sa maong balaod nga dugay na nilang gipaningkamutan.
“Dako kaayo namong gikalipay kay duha ka tuig kapin gyud mi nga nagsusi niini, nagtuyok, nangayo og mga forum, mga konsultasyon hangtud nga niabot ta pinaagi sa pag-apruba sa legislation nga kita formally mahimo tang Davao de Oro,” saysay ni Uy.
Samtang gikatakda usab nga magbaton og usa ka plebisito sa pagpanguna sa Commission on Election (COMELEC) nga posibleng mahitabo sa bulan sa Setyembre karon nga tuig.
“Aron mahimo gyud syang opisyal nga mahimo na gyud tang Davao de Oro, mag conduct pa ang COMELEC og plebisito. Ang atong mga katawhan sa ComVal magboto, YES or NO. YES kung gusto nila mahimo tang Davao de Oro. NO kung dili pud sila gusto,” saysay ni Uy.
Nagpasalamat usab ang gobernador sa probinsya kang Senador Juan Edgardo “Sonny” Angara ug kang Senador Juan Miguel “Migs” Zubiri ingon man nila Congresswoman Maricar Zamora ug kang Congressman Ruwel Peter Gonzaga sa kongreso nga anaa sa likod sa maong kalampusan.
RadyoMaN Kirby Manzon
