Davao Del Norte, ipailawom sa state of calamity

Davao City – Giuyunan na sa Provincial Government of Davao del Norte nga ipailawom sa state of calamity ang tibuok probinsya human sa sunod-sunod nga linog ug aftershocks nga miigo sa Manay, Davao Oriental, diin nabati sab mismo sa lugar niadtong Oktubre 10, 2025.

Kini subay sa nahitabong panagtagbo nga gipangulohan ni Governor Edwin I. “Kuya Gob” Jubahib uban sa mga opisyal sa probinsya ug ni Department of Public Works and Highways (DPWH) Secretary Vince Dizon sa Davao del Norte Sports and Tourism Complex (DNSTC) sa Mankilam, Tagum City.

Sumala sab ni Vice Governor Clarice Jubahib, nagkahiusa ang Sangguniang Panlalawigan ug ang ehekutibong departamento sa maong desisyon alang sa paspas nga pag-apruba sa calamity fund ug paspas nga pagpatuman sa relief ug rehabilitation efforts, asa mapahimuslan gilayon sa mga apektado sa linog.

Samtang, gipresenta sab ni Gov. Jubahib nga mukabat na sa ₱755,365,000 ang natala nga kadaot, ug nagpadayon pa sab ang assessment aron masiguro nga makab-ot sa tanang apektadong lungsod ang hinabang gikan sa probinsya ug sa nasyonal nga gobyerno.

RadyoMaN Kareen Beltran