Lakip sab ginasuta sa kapulisan ang motibo sa suspek nga mibugha sa fish vendor nga giilang si Eric Relator Mediano, 29 anyos, minyo, ug nagpuyo sa Barangay Bato, Sta.Cruz, Davao del Sur.
Migawas sa inisyal nga imbestigasyon ni Police Staff Sergeant Ian Paul Araiz nga gikan nagsugal sa Alta Vista Cockpit Arena sa Digos ang biktima ug mupauli na unta kini sakay sa iyang motorsiklo dihang gisundan kini sa wala mailhing armadong nakamotor niadtong panahona.
Giingong pag-abot sa hitaboan sa krimen, kalit lang mi-overtake ang suspek ug dayon wa’y daghang istorya, gipusil sa makadaghang higayon ang biktima gamit ang punto 45 nga pistola kini subay sa mga basyo sa bala nga nakarekober gikan sa crime scene.
Paspas misibat palayo sa lugar ang suspek ug samtang daling gisapupo sa mga personahe sa CDRRMC nga miresponde ang biktima paingon sa Davao del Sur Provincial Hospital.
Apan pipila ka oras sa pagtambal ni gideklarang nakabsan sa kinabuhi ang fish vendor tungod sa mga samad pinusilan nga nahiagoman sa maong biktima.
Sa karon, gimando na ni Police Lt.Col.Hamlet Lerios ang mas lalom pang inbistigasyon dungan sa paglunsad og hot pursuit operation batok sa suspek nga mipatay sa fish vendor sa kasagsagan sa semana santa sa miaging semana.
RadyoMaN Joel Viray
