Davao City – Muabot sa 77-78 % ang populasyon sa Davao City Jail nga nag atubang og kasong may kalabotan sa iligal nga droga.
Sa AFP-PNP Press conference, gibutyag ni JC/insp Presco Manisan, bag-ong Jail Warden sa Davao City Jail nga anaa sa kapin 3,200 ka mga Persons Deprived of Liberty kun PDLs ang anaa karon sa nasangpit nga kulungan diin 2,343 niini nalambigit sa iligal nga droga.
Hinuon gibutyag ni Manisan nga duna nay kapin 100 ka mga PDLs ang nakagawas na kun naka-avail sa giingong plea bargaining niadtong Disyembre 2018.
Sumala sa Jail Warden nga ang plea bargaining sa drug cases mao ang usa ka kasabotan tali prosecutor ug sa PDL diin ang mga miangkon sa kaso posibleng mapagamyan ang jail sentences o mas gamay nalang usab ang multa apan depende gihapon sa unsa kadako ang kaso ug kantidad sa iligal nga droga nga nakuha gikan sa dinakpan.
Gani giingon og walay plea bargain deal, mapahamtangan og silot nga life imprisonment to death ug multa nga P500,000 kutob 10 million pesos ang nakulong.
Sa latest record sa Davao City Jail, anaay pending nga kapin 600 applications sa plea bargaining sa nasangpit nga kaso diin matud ni Manisan mudagan pa og pila ka bulan ang proseso niini gumikan usab sa kadaghan og kaso nga giatubang sa mga korte.
RadyoMaN Renz Barbarona
