Davao City – Natunga karon ang baruganan sa ‘third sex community’ sa Davao City bahin sa same-sex marriage kay dunay uyon ug duna say supak sanglit ang pagpakasal sulod sa simbahan usa ka sagrado alang sa babaye ug lalake.
Nasayod si ‘Francis’ nga usa ka beautician nga sala atubangan sa Dios ang same-sex relationship apan sama sa tinuod nga babaye mubati pod daw sila og gugma sa tinuod nga lalake.
Dawat ni ‘ Inday’ nga usa usab ka beautician nga dili pa andam ang Pilipinas sa same-sex marriage sanglit nagturok man gud sa atong kultura ang tinuhuan ug pagtulon-an sa simbahan.
Apan dili usab angay pugngan ang same-sex marriage nga gisuportahan ni Pres. Rodrigo Duterte kay para kuno mahatagan og katumanan ang gipangandoy nga kalipay sa kaminyoon sa nagka-higugmaay nga lalake sa lalake ug sa babaye sa babaye.
Gisugilon sa STP Investigative team ni Iwag Davao Organizer Diding Lopez nga ikalipay sa mga tomboy kun ipatuman daw ni Pangulong Rodrigo Duterte ang same-sex marriage sa nasud.
Wala kuno’y katungod ang ubang tawo nga maghukom sa mga bayot ug mga tomboy kun nahigugma man sila sa pareho ra pod nila og kasarian.
Alang kang Lopez nga ang pinakamahinungdanon anaa ang gugma ug pagsinabtanay sa matag usa busa dili daw angay wad-an og katungod ang same gender nga malipay sa kaminyoon.
Pabor si Lopez sa same-sex marriage apan dili kini uyon himoon ang kasal sulod sa simbahan inay mas maayo ang seremonya himoon atubangan sa huwis ug sa lokal nga kagamhanan kay sagrado lagi daw ang simbahan.
Sa katapusan, amo nahibaloan gikan kang Inday nga kadaghanan diay sa mga lalake nga nagpakasal og bayot usa pod diay ka mahuyang kay wala kunoy tinuod nga macho makigminyo sa usa ka bading.
Mga kasama, hinay-hinay nang natuman ang panagna sa bibliya nga magkadautan ang kalibutan diin ang kapungot sa Diyos iya gayod ibundak pag-abot sa pinal nga paghukom.
RadyoMaN Joel Viray
