Davao City – Mas maayo matud pa unta kon mas pahugtan na ang estado sa quarantine sa siyudad sa Dabaw karon nga padayon ug walay paglurang ang pagsaka sa kaso sa COVID-19 sa dakbayan.
Kini kung si Barangay Maa Kapitan Jun Cañete lang ang pabut-on diin sumala niini nga kung mahimo lang nga gikan sa kasamtangang Modified General Community Quarantine nga matapos karong adlawa, ibalik unta sa General Community Quarantine o di ba kaha sa Enhanced Community Quarantine ang siyudad.
Apan girespeto ug walay pagsupak si Kapitan Cañete sa desisyon sa gobyerno nga MGCQ gihapon ang dakbayan sanglit ang mahimo sa barangay mao lang man ang pagsunod kung unsay mando sa ilang labaw.
Bisan paman niini, naghimo gihapon og inisiyatibo ang Barangay Maa Council pinaagi sa pahimangno sa ilang katawhan mahitungod sa kamahinungdanon sa pagpuyo sa balay kon wala man la’y importante nga tuyo sa gawas karon nga nagdala gihapon og hulga sa tawo ang virus.
RadyoMaN Joel Viray
