Davao City – Mas gipakusgan karon sa City Health Office (CHO) ang kampanya batok dengue human sa pagdeklara sa Department of Health (DoH) sa National Dengue Epidemic.
Sa interbyu sa DXDC RMN Davao kang Elizabeth Banzon, ang Division head sa Tropical ug Nutrition Division sa CHO-Davao City, gisaysay niini nga sa pagkakaron anaa sa Dengue alert ang syudad sa Davao.
Saysay ni Banzon nga anaa usab ang desisyon sa City Health Officer sa pagdeklara sa Dengue outbreak sa dakbayan kung gikinahanglan.
“Dengue alert lang ta sa tanan karon diri. Then nag intensify ta sa atong Sabayang 4s ug mag Search and Destroy Measures,” saysay ni Banzon.
Gipasabot sa opisyal nga nag-unang rason sa pagdeklara sa DOH sa National Dengue Epidemic mao nga daghanan nang mga rehiyon sa nasud ang nagbaton sa taas nga kaso sa dengue.
Kahinumduman nga nagdeklara ang DOH og National Dengue Alert niadtong Hulyo apan gipataas kini ngadto sa epidemic aron mas mapatas-an ang lebel sa aksyon batok sa dengue virus.
RadyoMaN Kirby Manzon
