Davao City – Luwas ang siyudad sa Dabaw gikan sa sakit nga tipdas nga mihampak karon sa National Capital Region ug pipila ka bahin sa Luzon, Western ug Eastern Visayas ug pipila ka areas dinhi sa Mindanao.
Gikumpirma kini mismo ni Davao City Council (SP) Committee on Health Chairman Councilor Joselle Villafuerte sa pakighinabi sa STP Investigative Team kaniya pinaagi sa telepono.
Matud ni Villafuerte, walay gipaabot nga taho ang City Health Office (CHO) sa iyang buhatan nga dunay nagkasakit og tipdas nga mikutlo na karon og 55 ka kinabuhi sa NCR rason sa pagdeklara sa latest outbreak.
Nasayran nga gipaningkamotan gayud sa CHO nga ma-implementar ang measles vaccination program sa mga barangay aron masalbar ang mga kabataan gikan sa tipdas nga pwedeng maghatud sa ilang kamatayon.
Gitug-an sa konsehala nga daghan ang na-trauma sa Dengvaxia apan tungod na-kay edukar na og maayo ang mga tawo sa baksinasyon, daghan ang nagpabakuna ug nalikay sa tipdas.
Sa tan-aw ni Villafuerte nga mas angay kugihan pa sa mga health workers ang education campaign aron mas masabtan pa gyod og maayo sa publiko ang ka-importante sa baksinasyon sa lawas sa tawo.
Masaligon si Villafuerte nga dunay igong supply sa tambal ang siyudad gawas sa bakuna nga pangpang-alkontra sa dengue nga maoy numero unong suliran dili lang sa dakbayan apan bisan pa sa tibuok kalibutan karon.
RadyoMaN Joel Viray
