Davao City – Anaa sa unom (6) ka mga doktor gikan sa Southern Philippines Medical Center (SPMC) ang gipadala sa Zamboanga City aron motabang sa survivors ug injured human sa C-130 plane crash niadtong Domingo (Hulyo 4, 2021) sa Patikul, Sulu.
Gibutyag ni Davao City Mayor Sara Duterte-Carpio, alas 11:30 kagahapon sa buntag (Hulyo 5, 2021) migikan ang medical frontliners sa Davao, dala ang mga medical supplies nga ilang gikinahanglan sa pag-assist sa mga na-angol sa trahedya.
“As help nato as Dabawenyos, we sent 6 doctors to Zamboanga City, to assist (sa) ilang doctors didto kung unsa ilang mabuhat didto para sa mga survivors and those who are injured (sa C-130 plane crash),” sulti sa alkalde.
Ang medical team naglangkub sa duha (2) ka doktor gikan sa Emergency Medicine Department, usa (1) ka doktor sa Orthopedic, usa (1) ka doktor sa General Surgery, usa (1) ka doktor sa Anesthesiologist, usa (1) ka doktor sa Neuro Surgery ug usa (1) ka Nurse.
Dugang ni Mayor Sara, nagpadayon karon ang koordinasyon sa City Government of Davao ngadto sa Local Government Unit (LGU) sa Zamboanga City alang sa mamahimong matabang sa syudad human sa C-130 plane crash.
“Constant ang atong coordination with Zamboanga City Local Government Unit (LGU) because Zamboanga is our sister city. We are in constant communication with the LGU asking them if duna pa silay mga kinahanglan to support the retrieval, the recovery, and the treatment of the injured as well as the managment of the dead,” segun sa mayor.
Una na nang nagpadangat og pahasubo ang lokal nga gobyerno sa mga pamilya sa dol-an 50 ka mga sundalo nga namatay diin naka half-mast karon ang Davao City flag gikan sa Hulyo 5 hangtud Hulyo 9, 2021 alang sa mga namatay sa trahedya.
RadyoMaN Kirby Manzon
