Davao City – Motunol og tabang pinansyal ang lokal nga panggamhanan sa syudad sa Davao ngadto sa syudad sa Marikina human gidasig ni Davao City Mayor Sara Duterte-Carpio nga tabangan ang maong syudad kinsa gideklarang anaa sa State of Calamity.
Sa interbyu kang Davao City Vice Mayor Bernard Al-ag, gibutyag niini nga parte ang pagtinabangay sa sister-cityhood agreement sa Davao ug Marikina.
“Two months ago nag sign ta og agreement so since nalubog ang Marikina the other day, Mayor Sara requested the city council to utilize one million pesos of the Quick Response Fund (Calamity Fund) para himoong hinabang sa Marikina local government,” segun niini.
Sa kasamtangan aduna nay P11,000,000 ang natunol nga hinabang sa syudad sa Davao ngadto sa mga naapektohan sa kalamidad sa nagkadaiyang lugar sa Pilipinas.
Base sa resolusyon sa pagdeklara sa Marikina isip anaa sa state of calamity, anaa sa kapin 1,000 ka mga pamilya o 5,265 ka mga indibidwal ang aana karon sa mga evacuation areas human gilampornas kini sa Habagat.
Gi-aprubahan ang maong resolusyon ilawom sa suspended rules.
RadyoMaN Jason Amisola
