Davao City – Gipahigayon dinhi sa Dakbayan ang labing unang citywide earthquake and tsunami drill subay sa hagit nga palig-onon ang atong hiniusang katakos panahon sa kalamidad nga molampornas sa mga kabarangayan ug mga kasilinganan.
Gatusan ang nipartisipar gikan sa nagkadaiyang mga buhatan sa kagamhanang lokal ug nasyunal, mga tunghaan ug mga kolehiyo, mga establisimiento-komersyal inabagan sa mga disaster responders, rescuers ug uban pang mga kaalyadong hut-ong kansang partisipasyon kritikal alang sa kalampusan sa atong disaster response and action.
Ang unang scenario mao ang simulated scenario sa makusog nga linog nga Magnitude 7 samtang ang ikaduhang sitwasyon mao ang malagmit paglampornas sa tsunami kun ‘harbor wave’ nga molatas usab sa mga coastal barangays sa syudad.
Sa programang RMN Straight to the Point, gisugilon ni Undersecretary Renato Solidum sa Department of Science and Technology (DOST) nga daku ang panginahanglanon sanglit ang atong lokalidad nahimutang sa mga active faultlines.
Si Solidum, kinsa director usab sa Philippine Institute of Volcanology and Seismology (Phivolcs) nagkanayon nga ang lokasyon sa Davao diha sa mga posibleng maagian sa pagtay-og nagbutang kanato sa dakung hagit nga magpreparar.
Kahinumdoman nga ang Moro Gulf nga parte sa Celebes Sea usa sa mga lugar diin namatikdan ang mga tectonic activity diin adunay mga liki nga mamahimong mo-generate ug earthquake ingon man pagsaka sa tubig-dagat.
Niadtong 1976, usaka makusog nga linog nasinatian sa naasoyng lugar resulta kapin 5,000 nga namatay samtang 90 mil nawad-a’g panimalay.
Segun sa mga independent sources, angay gayud kitang magmabinantayon sanglit bantayanan ang mga coastal areas sa Mati Davao Oriental, Surigao del Sur, Monkayo Compostela Valley Province ingon man ang mga silingang dapit niini.
Sa pikas bahin, gibutyag ni Prime Cruz, disaster management expert and trainor nga angay kitang mag-vigilar sanglit ang makusog kaayong linog maghatud usab sa dakung purohan nga mosunod ang tsunami nga mas mopasamot sa trahedya.
Dinhi sa syudad sa Davao, mga residenteng nagpuyo sa sentrong bahin mamahimong molalin paingon sa mga high grounds sama sa RMC Gym sa Circumferential Road ug uban pang mga ‘safe zones and open spaces,’ kadtong nag-estar sa Lasang ug Bunawan area mamahimong modagan paingon sa Mahayag area ug kadtong mag residente sa Lanang ug Panacan mamahimong moderetso paingon sa hataas nga bahin sa Indangan area sa distrito sa Buhangin aron maluwas sa taas nga bul-og sa tubig.
Kasamang June Duterte
tags: Mindanao, Davao City, DXDC, DXDC 621, City wide earthquake and tsunami drill
