Mati City – Mokabat sa 25 ka mga giingong miyembro sa Pinatikan Religious Cult ang misulong o miataki sa Davao Oriental Provincial Jail kung asa gibilanggo ang ilang lider partikular na sa Purok Maligaya, Barangay Sainz, Mati City, Davao Oriental alas 2:40 sa hapon niadtong Sabado (Agosto 14, 2021).
Sa interbyu sa DXDC RMN Davao kang Police Major Bembo Aying, Chief of Police (COP) sa Mati City Police Station, gibutyag niini nga gi-rescue sa armadong grupo ang ilang lider nga si C (Father Galon) uban ang laing unom (6) ka inmates nga bag-ong na-recruit sa ilang lider sulod sa prisohan.
Una niini gisundan sa armadong grupo ang jail vehicle pasulod sa compound ug didto na nahitabo ang pagpabuto ug binayloay sa bala nga miresulta sa pagkamatay sa usa sa mga suspek.
“Pagsulod nila (armandong grupo), gisabayan nila ang (sa) jail nga sakyanan, nisulod sa compound nila, nisabay (sila) didto’g sulod pud. Mao ‘tong ilahang gipabuthan ‘tong gwardya. Mao ‘tong nagbinalosay sila unya gi-rescue nila si Galon ug kadtong iyahang bag-ong na-recruit daw sa prisohan,” saysay ni Aying.
Gilayong gipahigayon usab sa awtoridad ang manhunt operation human sa insidente.
Kahinumduman, napasakahan og kaso ang lider sa grupo human kini nakuhaan og daghang armas atol sa pag-raid sa awtoridad sa ilang main nga simbahan.
RadyoMaN Kirby Manzon
