Davao City – Gipahigayun karong adlawa ang labing unang panagtagbo sa bag-ong namugnang Davao City Local Peace Committee kun DC-Peace aron sugdan na ang lokal nga hinabing pangkalinaw tali sa gobyerno ug sa New Peoples Army (NPA) dinhi sa syudad o rehiyon.
Ang meeting gipanguluhan mismo ni Mayor Inday Sara Duterte-Carpio inubanan nila ni DC-PEACE chair retired judge Ridgeway Tanjili ug mga committee members nga sila CSSDO head Maria Luisa Bermudo, Atty. Elisa Lapina sa City Legal Office, Punong Barangay Jessielito Areja sa Barangay Malabog, Paquibato District, Davao Archbishop Romulo Valles ug tinambongan usab ni OPPAP chair Irene Santiago isip consultant.
“Karon nga gi-institutionalize naman nato ang committee, ang gusto nato is something nga is very concrete coming from them nga gusto sila makig istorya sa City government. Initially nasugdan naman to and duna nay tasking ang mga members kung unsa ilang buhaton, so duna nay mo reach out,” segun ni Mayor Duterte.
Gibutyag sa alkalde nga sugod karon hangtud sa ipahigayon nga DCPEACE meeting karong Nobyembre 1, paaboton sa komitiba ang mamahimong opisyal nga tubag sa tulo ka giilang mga NPA leaders dinhi sa Davao City kalabot sa tanyag sa syudad.
“Kaganina during the meeting, there were three identified commanders for Davao City and then gi-target namo nga silang tulo i-reach out and (kung) ganahan ba sila makig istorya,”giingon ni Duterte.
Apil usab sa mga nahisgutan ang sugyot ni Santiago nga pagpailawom sa mga miembro sa gikinahanglang peace-building workshop, ang pagsuta kung aduna bay ipahigayon nga suspensyon sa military operations ingon man ang pagplastada sa mga insentibong mamahimong madawat sa mga rebelde gikan sa lokal nga pamunuan ingon man ang existing Comprehensive Local Integration Program o CLIP sa gobyerno.
RadyoMan Aimee Guinita
