Davao City – Gipasigarbo karon ni Davao City Mayor Sara Duterte-Carpio ang malampusong nabuhat sa ‘Peace 911’ program sa syudad ilabi na sa dakung kabag-ohan sa pagkab-ot sa kalinaw partikularmente sa Calinan ug Paquibato Districts nga 40 ka tuig napailawom sa kagubot kaniadto.
Kini ang mensahe ni Duterte-Carpio atol sa pag-abli sa ‘DILG Seminar on Local Peacebuilding’ ingon ug ‘Forum on Positive Peace’ karong adlawa diin siya nanghinaut nga mamahimo kining ehemplo kun template sa pamaagi sa pagkab-ot sa kalinaw sa uban pang lugar sa Pilipinas diha sa ilang local peacebuilding campaign.
Sumala sa alkalde, ang nahimong susi sa maong programa mao ang pagdawat sa mga residente sa nasangpit nga mga lugar sa maong programa pinaagi sa pagpaminaw sa mga concerns o mulo sa maong lokalidad.
Ang aktibidad karong adlawa gipangulohan sa DILG tinambongan sa representante sa mga munisipalidad, syudad ug mga private sector, academe, civic clubs ug uban pa.
Ang kalihukan subay sa EO 70 Series 2018 nagtumong sa pagkab-ot sa kalinaw pinaagi sa gitawag nga ‘whole-of-nation approach’, pagmugna og usaka National Task Force nga naka-focus diha sa pagtapos sa local communist armed conflicts ug pagsagop sa usaka comprehensive national peace framework.
Kahinundoman nga base sa Global Peace Index polling niadtong June 2019, nigula nga anaa sa Rank 134th ang Pilipinas gikan sa 163 independent countries nga gi-survey kalabot sa ilang mga ongoing peace infrastructures.
RadyoMaN Jason Amisola
