Davao police gipangdeploy sa mga sam-ang

24

Davao City – Gideploy na sa mga pampubliko ug pribadong sementeryo ang daghang ihap sa mga kapulisan sa Davao City Police Office (DCPO).

Atol sa send-off ceremony, gipahimangnuan ni DCPO head P/Sr. Supt. Alexander Tagum ang iyang mga personahe nga ayuhon ang ilang mga trabaho ug bantayan og maayo ilang areas of responsibility.

Gitinguha sa DCPO nga mamahimong malinawon ug walay mahitabong kakulian atol sa paghinumdom sa adlaw sa mga minatay.

Sugod usab karong adlawa hugot nga ibawal ang mga hinagiban o mga deadly weapons ug makuting inspeksyon ang himuon sa mga awtoridad sa mga musulod sa mga sam-ang aron walay makalusot nga mga kontrabando.

Dugang niini, 24-oras nga magbantay ang mga pulis ug magpatrolya usab sila sa mga residential areas aron mapugngan ang pag-atake sa mga dautang elemento samtang walay mga tao sa mga kabalayan.

Nagpahimangno si Tagum sa mga security personnel sa mga subdivision nga doblehon ang pagbantay.

Gisulti ni Tagum nga aduna nay mga awtoridad nga nagbantay sa mosoleo sa ginikanan ni Pangulong Rodrigo Duterte.

Panawagan ni Tagum sa mga ginikanang magdala og mga bata nga magbutang og mga pangalan ug contact numbers sa mga bulsa sa ilahang mga anak kung ugali mang mawala kini.

Nakaaandam na usab ang mga Police Assistance Desks sa mga sementeryo aron mudawat og mga public concerns.

RadyoMaN Aimee Guinita

Facebook Comments