Davao City – Hangtud karon pareho anaa pa sa evacuation center ang mga pamilya nila Rosalinda Monton ug Asterio Mola kay tagatuhod gihapon ang lapok sulod sa ilang mga balay tungod sa dakong baha niadtong miaging semana.
Nasayod sila Mola ug Monton nga delikado puy-an ang ilang dapit tungod kay anaa kini daplin sa Davao River sa Barangay 19-B apan wala silay mahimo gawas sa pagsuong sa kuyaw.
Apan andam kuno sila muhikling sa mao nga dapit kung maghatag og relokasyon ang kagamhanang lokal apan kun wala silay kabalhinan dili gayod sila muhawa bisan pa og mando pa ni Davao City Mayor Inday Sara Duterte-Carpio.
Lima ka purok sa Barangay 19-B partikular sa El rio ang naigo sa baha sa miaging semana ug kapin usa ka libo ka pamilya kun kapin tres mil ka indibidwal ang apektado ug sagad mga muslim.
Segun ni Barangay Disaster Risk Reduction Management (BDRRM) Chief Benito Viray nga tulo ka tribo sa mga muslim ang nagpuyo sa dapit ug ang ilang mga katigulangan gikunsidara nga mga lumad sa mao dapit.
Busa ingon ni Viray nga murag lisod mahitabo ang gusto sa mayor nga pugson sila og pahawa sa dapit kay sigurado muagi kini og kasamok kun ugali puwersahon sila og hikling sa ilang mga pinuy-anan.
Ang barangay aduna nay rekumendasyon niadto nga dili na pa-puy-an ang daplin sa Davao River gumikan kay matag mukusog ang uwan sa bukid paspas muawas ang sapa ug mabahaan dayon ang kabalayan.
Apan ang problema lang nakagamot na og puyo ang ilang mga katigulangan sa nasangpit nga dapit mao na nga lisod kaayo sila papahawaon bisan gani og padulhog na ang baha gikan sa bukid dili pa gani sila muhawa.
Bisan og panahon na unta nga pabalhinon sila apan lisod ma-implementar gawas kung ang mga tag-iya na mismo mangusog sa pag-angkon pag-usab sa ilang mga luna diha dunay posibilidad nga mahawa silang tanan.
Walay laing nakita nga solusyon si Viray aron makumbisir ang kadaghanan sa paghikling sa ilang mga balay nga nakatukod daplin sa davao river kundi mao ang pagtanyag og relokasyon.
RadyoMaN Joel Viray
