Davao City – Angayan lang i-relocate ang mga nagpuyo daplin sa Davao River sanglit anaa sa kakuyaw ug kadelikado ilang kahimtang panahon nga magbaha, hinungdan nga nakahukom si Davao City Mayor Inday Sara Duterte-Carpio nga ipa-demolish ang mga kabalayan daplin sa kasapaan diin gisugdan kagahapon didto sa may Brgy. 40-D ilawom sa tulay human gipangdemolish ang gipoy-an sa mga residente.
Sumala ni Office of Civil Defense (OCD-XI) regional director Leoncio Cirunay nga pabor siya nga gipatuman sa panggamhanan ning dakbayan sa pagdemolish sa mga kabalayan aron luwas kun hisgotan ang seguridad sa katawhan.
Matud ni Cirunay nga pasabton lang ang mga apektadong lumulupyo nga kining gihimo sa mayor alang sa kaayohan sa tanan tumong nga maluwas kun panahon sa kalamidad ug tungod niini gikinahanglan nga musonod ang katawhan nga nagpuyo sa daplin sa sapa aron malikay sa peligro ang ilang kinabuhi.
Naglaum si Cirunay nga adunay gitagana ang panggamhanan ning siyudad alang sa kabalhinan sa mga naapektuhan apan nagtuo siya nga sa wala pa nagplano ang mayor sa pagdemolish, iya nang gipangandaman ang lugar nga didto i-balhin ang mga apektado sa nagpuyo sa ‘danger zone’ areas.
RadyoMaN Don Pulayao
