Davao City – Napungot ang ubang mga pasahero ug Dabawenyo sa grabeng trapiko nga nasinatian niadtong adlaw’ng Sabado, Disyembre 22.
Ubay-ubay ka mga netizens ang nagpagawas sa ilang gibati sa social media human nakasinati og duha ngadto sa tulo ka oras nga traffic gani ang uban naglisod usab og sakay ug naulanan pauli ug padulong sa ilang tagsa-tagsa ka mga destinasyon.
Sumala ni City Transport Traffic Management Office (CTTMO) head Dionisio Abude, ang maong trapiko resulta usab sa road closures nga gipatuman niadtong adlaw’ng Sabado gumikan sa Banda Dasig nga aktibidad subay usab sa Pasko Fiesta sa Davao.
Busa nangayo og pagsabot ang lokal nga gobyerno ngadto sa katawhan gumikan aprubado usab sa local government ang road closures gumikan sa aktibidad ug pahimangno ngadto sa publiko nga sundon nalang ang alternatibong mga dalan.
Gawas sa aktibidad niadtong Sabado, subay sa gipagulang anunsyo sa CTTMO, laing road closures usab ang ipatuman karong Dec. 25, 2018 (6pm to 12mn), Yugyugan sa Pasko, Tugtugan sa Pasko sa Dec. 26, 2018 (6pm to 12mn), Torotot Festival – Dec. 31, 2018 (7pm to 1am) diin sirado niini ang C.M. Recto Ave. cor. San Pedro St., Bolton St. cor. Rizal St., Ponciano St. cor. Rizal St., Pichon St. cor. Bolton St., apan mamahimong muagi sa Rizal St. ug Claveria St. lakip na sa Anda St..
RadyoMaN Renz Barbarona
