Davao Vices Regulation Unit collection, misaka sa P7-M sa 2023

Davao City – Ang pag-abli sa mga establisemento gikan sa hugot nga restrictions tungod sa pademya ang usa sa rason nga mas dako ang nahimong koleksyon sa Davao City Vices Regulation Unit (VRU) karong tuiga, 2023.

Sa pakighinabi sa DXDC RMN Davao kang Jalyn Pareja, Administrative Staff sa VRU-Davao, iyang gibutyag nga gikan January hangtud July 2023, muabot sa P7,223,000 ang koleksyon sa opisina gikan sa mga violator sa Anti-Smoking, Liquor Ban ug Sobriety Ordinance.

Ang maong koleksyon mas taas itandi sa nakolekta sa susamang period sa miaging tuig, 2022 nga anaa lamang sa P5,267,200.

Kung itandi ang natala sa July 2023 ug July 2022, sa Anti-Smoking Ordinance, misaka kini sa P4,434,000 gikan sa P3,299,200; Liquor Ban, misaka sa P2,321,000 gikan sa P1,836,000; ug Sobriety Ordinance nga misaka sa P468,000 gikan sa P132,000.

“Nagsugod gyud karon nga year, medyo nidaghan gyud ang nag-open nga mga bar, mga establishment. So, mao pud nga nanaghan pud atong mga apprehension,” saysay ni Pareja.

Padayon usab karon ang pag-intensify sa otoridad sa ilang monitoring ug pagpanakop sa mga makalapas sa maong mga palisiya o balaod nga gipatuman dinhi sa dakbayan sa Davao.

RadyoMaN Kirby Manzon