Davao City – Fake og walay kamatuoran ang nigula nga mga taho nga alegasyong adunay pasyenteng gisuspetsahang infected sa 2019 novel Corona Virus (nCoV) nga gidala sa isolation facility sa Southern Philippines Medical Center (SPMC).
Ang klaripikasyon giluwatan karon ni Dr. Ricardo Audan, SPMC Chief of Clinics atol sa interbyu sa DXDC 621 RMN Davao aron pagpatino sa kamatuoran.
Nagpahimangno kini sa publiko nga mahimong responsable ug dili magpataka og post sa mga dili beripikadong mga impormasyon nga mamahimong ikabalaka o ika-panic sa kadaghanan.
Ciento por ciento nga preparado usab ang mga personahe ug ang isolation facility kung aduna may suspected case.
Samtang, negatibo ug walay na-monitor ang Bureau of Quarantine nga mga pasahero nga nakasinati og kalintura luwan sa Xiamen Air nga niabot sa Davao International Airport gikan sa Jinjiang, China kagahapon adlawng Dominggo ug uban pang mga international flights.
Sa interbyu sa RMN Davao kang Dr. Wilson Lim, Quarantine Medical Officer IV sa Bureau of Quarantine XI nagbiling zero cases sa 2019 nCoV ang Davao City ug entero Davao Region.
RadyoMaN Aimee Guinita
