Davao City – Bisan pa man nga walay kaso sa SARS-like virus ang Davao City ug ang entero sa Davao Region, wala gihapon kini magkumpyansa.
Sumala ni Sangguniang Panglungsod (SP) Committee on Health chairperson City Councilor Joselle Villafuerte, nagpahigayon og emergency meeting si Davao City Vice-Mayor Sebastian Duterte uban ang mga concerned agencies sama sa Department of Health (DOH), City Health Office (CHO), Bureau of Quarantine, Bureau of Customs (BOC) ug uban pa.
Segun ni Villafuerte, gi-activate na ang mga trained teams nga natukod kaniadto batok EBOLA virus ug preparado gayod ang dakbayan sa pagresponde batok sa Wuhan City coronavirus strain.
“Ang SPMC may three beds para sa mga isolation cases, two ambulances dedicated to highly contagious diseases,” segun ni Villafuerte.
Hugot nga nakabantay karon ang Bureau of Quarantine sa tanang mga international flight arrivals sa Davao International Airport.
Sumala ni Dr. Wilson Lim, Quarantine Medical Officer IV sa Bureau of Quarantine-XI, negatibo o walay na-monitor ang thermal scanner sa mga pasaherong niabot sa Davao gikan sa China, Hongkong ug Singapore.
Matud ni Lim, istrikto nilang ginapatuman karon nga una makasakay o makanaug sa eroplano ang mga pasahero, muhatag una og clearance ang Bureau of Quarantine.
RadyoMaN Aimee Guinita
