Davaoeño, gikalipay ang pag-ubos sa COVID-19 cases

Davao City – Mapasalamaton ang usa ka Davaoeño nga hinay-hinay na nga nagbalik sa normal ang sitwasyon tungod sa Coronavirus Disease 2019 (COVID-19), diin naobserbahan usab niini nga ubos na ang natala nga kaso dinhi sa Davao Region.

Sa interbyu sa DXDC RMN Davao kang Josephine Gana, 65 anyos, taga Bolton Isla, Barangay 76-A, Davao City, iyang gisulti nga gawas sa COVID-19 primary doses, naka-avail na usab siya ug ang iyang pamilya sa unang booster dose, ug wala usay problema kanila ang ikaduha ug dugang booster shot.

“Ni-okay man nuon nga daghan ang vaccinated kaysa sauna nga wala gyoy nagpa-vaccine, diba kada adlaw gyud nagtaas ang (COVID-19 cases). Mas importante nga magpabakuna para naay kay panangga sa virus,” matud ni Gana.

Sa datos sa Department of Health (DOH)-XI, anaa lamang sa 75 new COVID-19 cases ang natala gikan June 19-25, 2023, diin kini ubos og 9.64% sa natalang kaso gikan June 12-18, 2023.

Karong adlawa, June 30, 2023 sugdan na usab sa City Government of Davao ang pag-administer sa 3rd Booster o ang Bivalent COVID-19 vaccine alang sa A1 (Health Workers) nga 18 anyos pataas ug A2 (Senior Citizens).

RadyoMaN Kirby Manzon