Sa pakighinabi sa DXDC RMN Davao sa Davaoeño nga si Josephine Gaña nga taga Barangay 76-A, Bucana, iyang gisulti nga ang iyang mga apo nagasuot gyud og face mask sa eskwelahan ilabi na nga uso karon ang ubo nga posibleng tungod usab sa pabag-o bag-o nga dagan sa panahon.
“Mas okay gyud mag-face mask. Naga-face mask man gyud ni sila (akong mga apo) para dili matakdan kay uso man gud ang ubo ug sip-on karon. Kami gani pud diri nangapagaw na gani,” matud ni Gana.
Matud usab sa netizen ug usa ka inahan nga si Digna Gozon Bahan, iyang gibutyag nga napaabot na kanila nga mga ginikanan ang maong direktiba, diin nakita usab niya ang importansya sa pagsuot og face mask aron malikay sa sakit ang iyang anak.
“Kini nga advisory gi-send sa gc (group chat) sa akoang grade 7 so dili gyud ta magtanga, mga parent kay para ni sa safety sa atoang mga anak,” matud sa netizen.
Una niini, nagpagawas og direktiba ang Davao City Health Office (CHO) sa mga eskwelahan sa pag-awhag sa mga estudyante ug mga personahe sa mga eskwelahan sa syudad nga magsuot og face mask tungod sa nagkataas nga insidente sa viral respiratory illnesses.
Samtang, suportado usab sa Department of Education (DepEd) ang direktiba apan ilang gipasabot nga dili mandatory ang pagsuot og face mask ilabi na niadtong walay simtomas sa sakit.
RadyoMaN Kirby Manzon
