Sa interbyu sa DXDC RMN Davao kang Barangay Mandug Kapitan Rey Ototan, iyang gisulti nga hugot ang pag-monitor sa ilang health personnel ilabi na ang mga lugar nga adunay dengue cases diin usa sa mga lakang nga gihimo mao ang soaking o paghumol sa mosquito nets ug mga kurtina nga adunay medisina nga makatabang aron nga malikayan ang lamok nga nagdala sa maong sakit.
Matud sa kapitan nga ilaha usab nga ginasiguro nga maayudahan ilabi na kadtong mga pamilya nga adunay mga pasyente nga nabiktima sa denge.
“Naay naabot og usa ka semana na sa hospital. Among ginabuhat, nagahatag mi’g assistance. Diha sa SPMC (Southern Philippine Medical Center), ang imong watcher stay-in, so dili makagawas-gawas, ang pamilyang nabilin luoy kaayo. So, naghatag mi’g food packs ilabi na gyud sa ilang pamilya,” matud sa kapitan.
Subay sa datos sa Department of Health (DOH)-XI, gikan January hangtud July 2023, adunay natalang 8,681 nga dengue cases. Halos doble ang ihap kung itandi sa 4,559 nga kaso nga natala sa susamang period niadtong 2022.
Pinakadaghang kaso natala sa Davao City nga adunay 3,480 cases; Davao del Norte – 1,947; ug Davao de Oro nga adunay 1,099 cases.
RadyoMaN Kirby Manzon
