Sa pakighinabi sa DXDC RMN Davao kang Nonah Vee Ebero, 34 anyos, inahan sa iyang tulo ka anak, iyang gisulti nga mag-napulo ka tuig na sila nga kasal sa iyang bana. Adunay mga higayon nga sila mag-away apan ilang gipaningkamutan nga maresolba ang isyu ug kini dili musangpot sa panagbulag.
“Mura’g easy nalang siguro nga “Okay ra magpakasal kay naa may divorce.” Mura’g anaa na gyud ilang mindset. Kulang lang gyud na sa pag-ampo gani kamo gyong duha mag-partner. Kung focus mo sa imong pamilya, mura’g dili man mo muabot sa ingon ana nga punto,” matud ni Ebero.
Apan, gipasabot ni Ebero nga dili usab niya mabasol ang ubang magtiayon ilabi na ang pagdesiyon sa asawa nga makigbulag ilabi na kung siya gina-abuso ug ginapasakitan na sa iyang partner.
“Nganu pilitin man gyud kung dli na magkasinabot? Lisod pud kung mag-sige ra’g away tas kung lalaki way pulos. May pa’g magbulag kung ang ginikanan gihapon magbuhi sa iyang pamilya,” kumento usab sa netizen ug Davaoeño nga si Jhaneza Seno Nicolas.
Bag-ohay lamang sa dihang giaprubahan sa usa ka Komite sa Senado ang Senate Bill 2443 o ang Absolute Divorce Bill. Sa report sa Committee on Women, Children, Family Relations and Gender Equality, gipalapdan pa ang basehan sa Absolute Divorce sama sa musunod: Lima (5) ka tuig nga wala na nag-uban ang magtiayon; Adunay nahitabong pagpanglugos ayha o human gikasal; Dili na maresolba ang relasyon; Kung adunay nahitabong pisikal nga pagpangabuso, ug uban pang basehan sa legal separation nga nakalatid sa Family Code.
Niadtong Pebrero 2020, giaprubahan usab sa Committee on Population and Family Relations sa House of Representatives ang usa ka bill sa paghimong legal sa divorce sa Pilipinas.
RadyoMaN Kirby Manzon
