Davao City – Wala nagdahum si Juven Luzorata, 24-anyos, taga Maco, Davao de Oro nga mag-top 1 kini sa Agricultural and Biosystem Engineering (ABE) Board Examination niadtong September 2021 diin nakakuha kini og 83.02% passing rate.
Sa interbyu sa DXDC RMN Davao kang Juven, migradwar sa University of Southeastern Philippines (USeP) – Tagum City, gisaysay niini nga tungod kay wala kini ikapa-enroll sa review center, ang mga review materials sa iyang classmates ang iyang gigamit aron nga maka-study nga nakatabang usab sa iyang engineering board exam.
“Naa man gud ko sa gawas ato, sa Pisonet. Nagdala ra ko’g piso kay para nga makatan-aw sa result. Pagkakita nako, nidagan dayon ko padulong diri sa balay unya giingnan dayon nako akong pamilya nga “Engineer na ko!” Mao ‘to nalipay kaayo sila,” saysay ni Juven.
Gi-share usab ni Juven ang kalisod sa kinabuhi nga iyang naagian diin aduna kini mga buot paliton kaniadto nga dili niya ma-afford tungod sa kakulangan sa pinansyal.
Mensahe sa top notcher sa mga batan-on nga dili magpadala sa mga kapakyasan sa kinabuhi o bisan sa pagtuon, diin kini dako og tabang sa pagkab-ot sa damgo ug pangandoy.
“Dapat consistent. Dapat naay perseverance nga dili ka moundang bisan og dagha’g failures. Kay diha sa failures makakita ‘ta og learning. Tungod sa failure ma-identify nato asa ‘ta lacking, ug keep praying lang gyud kay God,” mensahe ni Juven.
Samtang, kung aduna may pahinungod ang eskwelahan nga incentive tungod sa dungog nga gihatag niini, buot niya kining i-save ug i-invest sa negosyo aron kini makatabang sa iyahang pamilya.
Sulod usab sa Top 10 sa ABE Board Exam gikan sa USeP-Tagum si Yllor James Otero (Top 4) nga adunay 81.96% rating ug Top 10 si Eldie Daffon nga adunay 81.31% passing rate.
Nasayran nga anaa sa 36.42% ang passing rate sa maong board exam diin anaa sa 507 ang nakapasar sa 1,392 nga nag-take sa maong exam sa tibuok Pilipinas.
RadyoMaN Kirby Manzon
