Davao City – Pabor ang kasagarang mga taga Davao sa pagtangtang ni Pres. Rodrigo Duterte kang controversial Bureau of Corrections (BuCor) Chief Nicanor Faeldon gumikan sa pagsupak sa mando sa nahauna nga dili tugtan ang pagrelease sa mga ‘high profile inmates.’
Gi-uyonan karon ni Carlito Legaspi, residente sa Barangay 31-D Poblacion District ang nahimong hukom sa presidente sa pagtaktak sa puwesto kang Faeldon sanglit kun dili kini himoon, mawad-an og bili ang kampanya kontra droga ug kurapsyon nga gikasa sa gobyerno.
Matud ni Gerardo Perez, taga-barangay Leon Garcia, distrito sa Agdao nga dapat lang matanggal sa posisyon si Faeldon gumikan nakaduhig lamang kini sa imahe sa Duterte administration.
Alang Kang Perez, dili na takos hatagan pa og lain nga posisyon sa ubang ahensiya si Faeldon tungod sa lain na usab nga kontrobersiya nga gilambigitan niini human sa isyu sa pagpalusot sa P6.5B nga kantidad sa shabu dihang siya pa ang Bureau of CustomS (BoC) chief.
Dugang niini, dili lamang hangtud pagtanggal ang ipatilaw sa kanhi BuCor chief apan hampakan usab kini og kasong haom sa iyang negligence.
Kahinumduman nga gigisa og maayo sa mga Senador atol sa Senate inquiry in aid of legislation ang kanhi Marines Captain bunga sa na-oktaba nga pag-release unta ni former Calauan Mayor Antonio Sanchez ug pinasikad sa Good Conduct Time Allowance (GCTA) law nga nagtungot usab sa mga ‘high profile inmates’ nga sentensyado sa life sentence kun reclusion perpetua nga makagawas gumikan sa gitawag nga ‘good behavior’ samtang nabilanggo.
RadyoMan Joel Viray
