Davao City – Gitataw sa Philippine Drug Enforcement Agency (PDEA) XI nga nagpabilin silang pro-life sa matag ikasa nila nga operasyon.
Sa interbyu sa RMN Davao kang PDEA XI Asst. Regional Director Behn Tesiorna giklaro niini nga gawas nalang kung mabutang na sa peligro ang kinabuhi sa ilahang mga personahe dili nila kini itugot nga mahitabo.
Niadtong Lunes alas-11:20 sa gabie sa may Golden Valley, Lower Arroyo Compound, Matina ning syudad napatay human nisukol sa mga awtoridad atol sa buybust operation ang gikonsiderang Top 1 Drug Personality sa Davao del Norte nga si Freddie Sacurat, 32 anyos.
Matud ni Tesiorna nga hagbay na nila gipangita ang notado ug idlas nga suspek sa Davao del Norte apan sa dihang positibo kining napalitan sa agent sa PDEA og P15,000 nga shabu nakamatikod kini sa buybust og nakigpunisilay sa mga awtoridad matud pa gamit ang iyahang .38 nga revolver.
Nakabsan na sa kinabuhi ang suspek sulod sa Southern Philippines Medical Center.
Samtang, narekober sa PDEA ang medium sa sachet sa shabu sulod sa maong lugar nga nagkantidad og P165K ug mga drug paraphernalias.
Arestado usab ang live-in partner niini nga si Karen Ngoho nga matud pa tig mentenar sa drug den ug laing upat pa ka mga drug suspeks nga naabtan sulod sa maong panimalay nga sila Kent Sisneros, Aljon Adlawan, Orland Permo ug Alicia Aballe.
Matud ni Tesiorna nga ipasang-at karong adlawa ang kasong may paglapas sa Sec. 5, 6, 7, 11 ug 12 ubos sa RA 9165 ang mga naarestong mga suspek.
RadyoMaN Aimee Guinita
