Davao City – Napasakahan na og kaso sa Criminal Investigation and Detection Group (CIDG) Davao Oriental Provincial Field unit ang usa ka barangay kapitan lakip na ang driver niini ug usa ka barangay health worker (BHW) sa giingong iregularidad sa distribusyon sa Special Amelioration Program (SAP) sa gobyerno.
Sa interbyu sa DXDC RMN Davao kang Alex Roldan, Regional Director sa Department of Interior and Local Government (DILG)-XI, gibutyag niini nga napasakahan na og kaso ang nahisgutan human kini gisumbong sa kapulisan.
“Ang mga barangay official, sa usa ka barangay sa Davao Oriental nga caught on the act. Then, gi-blotter man ‘to siya then gihap-an sa mga pulis, didto nakuha gyud siya. Na-file’an ‘to sila og kaso,” butyag ni Roldan.
Gitataw ni Roldan nga tanang reklamo nga madawat sa DILG labot sa SAP i-turn over na sa CIDG nga maoy maghimo og ‘case build-up.
Samtang, kagahapong adlawa, Mayo 19, 2020 nagpadala na og advisory si DILG Secretary Eduardo Año sa mga barangay kapitan nga wala pa nag post sa mga SAP beneficiaries aron magbaton og ‘transparency’ labot sa nakadawat sa maong ayuda sa gobyerno.
RadyoMaN Kirby Manzon
