Davao City – Hitsas na ang seguridad alang sa umaabot nga Davao Region Athletic Association kun DAVRAA Meet 2019 karong Enero 27 hangtod Pebrero 2, nga mahinayon dinhi sa dakbayan sa Davao.
Sumala ni Police Regional 11 spokesperson P/Chief Insp. Jason Baria, gipaniguro nila ang seguridad sa matag atleta pinaagi sa pag-escort niini gikan sa ilang girepresentar nga lugar paingon sa syudad sa Davao hangtod mismo sa billeting areas ug playing venues.
Dugang ni Baria nga gibase usab nila ang ilang augmented forces gikan sa Davao City Police Office (DCPO).
Samtang gibutyag ni P/Sr. Insp. Ma. Teresita Gaspan, tigpamaba sa DCPO, nga sa ikaduhang tuig nga pag host sa DAVRAA sa Davao, adunay liboan ka mga personahe gikan sa ilang buhatan ang ilang i-deploy matag adlaw aron mapaniguro ang kahapsay ug kalinaw sa maong aktibidad diin magmontar usab sila og police assistance desks sa matag billeting areas.
Sa pikas bahin, all set na ang 11 ka mga delegado alang sa opening ceremony sa DAVRAA Meet 2019 karong Enero 27, adlaw’ng Domingo sulod sa UP Sports Complex dinhi sa syudad.
Sumala ni Janeth Veloso, chief of the curriculum and learning management division sa DEPED 11, giexpectar nila ang 7, 000-8, 000 ka mga contingents gikan sa Davak Oriental, Mati, Compostela Valley, Tagum, Davao del Norte, Panabo, IGACOS, Davao Occidental, Davao del Sur, Digos, ug Davao City diin kini gikatakdang mangabot karong Enero 25, adlaw’ng Biyernes.
RadyoMaN Jason Amisola
