Davao City – Nagkalain-laing sistema ang gigamit karon sa Department of Education (DepEd) sa pagbalik-eskwela karong adlawa, Enero 6, 2020 sa Davao region partikular na sa mga biktima sa linog sa probinsya sa Davao del Sur.
Sa interbyu sa DXDC RMN Davao kang Jenielito “Dodong” Atillo, spokesperson sa DepEd-XI, gibutyag niini nga ang ilang gigamit mao ang alternative delivery mode (ADM) o ang klase-klaseng pamaagi sa pagtudlo aron mapadayon ang pagtuon sa mga estudyante.
Gipasabot ni Atillo nga sa alternative delivery mode (ADM), adunay pamaagi sa paggamit og module, home visitation o kaha pagsulod mismo sa mga gi-montar nga temporary learning spaces sa lugar.
Gipaningkamutan usab karon sa departamento nga mabalik sa mas daling panahon ang normal nga pagtuon sa mga estudyante samtang gina-proseso ang pagmontar og permanenteng school buildings sa nahisgutan.
“Continuous ning effort nato para ipadayon ning normalcy aning mga eskwelahan diha sa mga earthquake affected areas,” saysay ni Atillo.
RadyoMaN Kirby Manzon
