Davao City – Dead on arrival ang usa ka amahan samtang angol ang asawa niini ug duha ka anak tungod sa disgrasya sa Sinaragan Bridge, National Road, Barangay Sinaragan, Matanao, Davao del Sur alas-10 kagahapon sa buntag (October 15, 2021).
Sa interbyu sa DXDC RMN Davao kang Police Corporal Niel Arvin Babaylo, traffic investigator sa Matanao Municipal Police Station (MPS), giila niini ang biktimang namatay nga mao si Joel Pulvera Coma, 48-anyos, taga Christian Village, Digos City nagmaneho og multicab, samtang angol ang sakay nga asawa niining si Geraldine, 37-anyos ug 2 ka anak nga menor de edad.
Una niini, nawad-an og kontrol ang usa ka Sport utility vehicle (SUV), Toyota Fortuner nga gimaneho ni Mohammad Jameel Salasal Ibrahim, 26-anyos, taga HK Doton Street, Poblacion 3, Cotabato City, diin kini nagbiyahe padulong sa Digos City ug tungod sa kakusog sa ulan ug danlog nga dalan, na-slide ang sakyanan niini ug mipadulong sa pikas linya.
“Ulan daw kaayo unya na-slide kadtong Fortuner unya ang kadtong driver tungod daw sa wet daw nga dalan, nag-slide tapos nag-apply siya’g hand brake mao ‘tong ni-turn og 360 (degrees) ang iyang gi-drayban nga vehicle, mao ‘to nawad-an siya og kontrol,” saysay ni Babaylo.
Dinhi na nadisgrasya ang mag-pamilya human nga mibangga ang gisakyang multicab ngadto sa SUV. Samtang, na-damage usab ang usa pa ka sakyanan (Suzuki Ertiga) nga unang naigo sa pagtuyok sa SUV.
Kung dili ma-settle ang duha ka grupo ug pakyas nga ma-meet ang demand sa mga biktima, kasong Reckless Imprudence Resulting in Homicide, Physical Injuries and Damage to Properties ang atubangon sa driver sa SUV.
Pahimangno sa pulis sa mga motorista nga mag-doble amping sa dalan labi na panahon sa kusog nga ulan aron kalikayan ang susamang insidente.
“Dili man gyud malikayan nato ‘ni, unta kung kabalo lang pud ‘ta nga kusog ang ulan unya ang visibility, dili man pud tantong zero visibility pero dili kaayo makita ang dalan, maghinay-hinay lang gyud ‘ta,” sulti ni Babaylo.
RadyoMaN Kirby Manzon
