General Santos City— plano sa mga opisyal sa Barangay Glamang, Polomolok South Cotabato nga magpasiugda ug dayalogo ngadto sa tanang claimants sa giilugang luna sa Purok Sto. Rosario, kini human sa nahitabong engkwentro tali duha ka grupo sa mga nagailog sa maong luna niadtong Miyerkules, August 23, 2017.
Sumala ni Glamang Barangay Kagawad Rey Begura nga panahon na aron ipatawag ang mga claimants sa maong luna aron dili na masubli ang nahitabo sa nakalabayng adlaw nga miresulta sa kamatayon sa usa ka biktima ug pagkaangol sa pito pa human gipamusil sa mga miyembro sa usa ka pamilyang ga-claim sa lugar ang mga tawong gi-hire sa pamilyang Chua kansa gikaingong maoy tag-iya sa maong luna.
Nasayran nga patay sa maong insidenti si Dodo Cawag, samtang angol silang Dionicio Andojar, 31-anyos, Ricardo Molarto, 55-anyos, Jevin Galindo, 25 anyos, Juancho Malinog, 37-anyos, Reynald Talatara, 16 anyos, Eleazar Tequillo, 29 anyos, ug Elma Barion.
Dugang pa ni Begura nga sakit kaayo sa ulo sa mga opisyal sa barangay Glamang ang dugay nang problema sa inilugay ug luna sa maong lugar.
Naglaum usab ang nahisgutan nga unta makig-alayon ngadto kanila ang tanang claimants aron nga mahisgutan ang maayong sulusyon aron maundang na ang komplekto tali sa mga claimants aron nga dili na mahitabo pa nga adunay makalas nga kinabuhi gumikan lang sa inilugay ug yuta.
