Davao City – Gipaniguro sa kadumalahan sa Davao City Overland Transport Terminal (DCOTT) nga adunay igo’ng provincial buses alang sa biyahe bisan sa taliabot nga Bag-ong Tuig.
Sa interbyu sa DXDC RMN Davao kang Aiza Usop, DCOTT Manager, gibutyag niini nga adunay mga mubiyahe nga bus sa maong panahon o bisan niadtong Pasko apan pasahero lang ang medyo ubos ang ihap kung itandi niadtong wala pa ang pandemic hatud sa Coronavirus Disease 2019 (COVID-19) diin dili gihapon maabot sa 50% ang pasahero sulod sa sakyanan.
“Dili ‘ta mabaka sa atong mga bus kay ubay-ubay gyud ni siya. Ang pasahero ra gyoy wala sa atong mga bus,” tataw ni Usop.
Gibutyag ni Usop nga aduna nay mga biyahe sa bus nga magsugod alas-5 sa buntag hangtud alas-7 sa gabii.
Una na nga gipahinumdom ni Usop ang istriktong pagtuman sa health and safety protocols batok COVID-19 sa terminal ug sa biyahe sama sa pagsuot og face mask, face shield ug social distancing.
RadyoMaN Kirby Manzon
