DCOTT gisigurong igo ang bus nga mubiyahe sa December 31

Davao City – Gipaniguro sa management sa Davao City Overland Transport Terminal (DCOTT) nga igo ang mga bus nga mubiyahe ugmang adlawa, December 31, 2023 kung asa lauman pa ang pagtaas sa ihap sa mga pasahero nga mouli sa ilang mga probinsya asa ilang sugaton ang Bag-ong Tuig, 2024.

Sa interview sa DXDC RMN Davao kang Aisa Usop, manager sa DCOTT, iyang gisaysay nga mipasalig ang mga kumpanya sa bus nga aduna gihapon silay biyahe bisan sa unang adlaw sa Bag-ong Tuig.

“Atoa na nang gi-coordinate with our bus operators and according to them, kining mga big companies nato normal lang gihapon ang pagbiyahe nila. Kining mga small operators nato maoy nag-ingon nga mag-agad lang pud sila sa kadaghanon sa mga pasahero,” saysay ni Usop.

Matud ni Usop nga naabot usab nila ang target nga 1,000-1,500 ka biyahe matag adlaw o 50,000-75,000 ka pasahero ang matala.

Nagpahinumdom ang DCOTT manager sa mga pasahero nga magbaon og pasensya ilabi na nga dili malikayan ang taas nga pila aron masiguradong ma-inspeksyon usab ang mga bagahe alang sa luwas nga pagbiyahe.

RadyoMaN Kirby Manzon