DCOTT istrikto ang pag-inspeksyon sa mga pasahero

Davao City – Ubay-ubay na ka mga pasahero ang nidagsa sa Davao City Overland Transport Terminal (DCOTT) human sa pagsuspende sa pagpasakay sa mga pasahero sa bus stops sa dakbayan sa Davao, lakip na niiini ang mga van ug Libreng Sakay.

Sa interbyu sa DXDC RMN Davao kang Aiza Usop, manager sa DCOTT, gisaysay niini nga manual nga gina-inspeksyon ang mga pasahero ug ilang mga bagahe lakip nang ginapasimhot usab sa K-9 unit pagsigurong kini luwas sa delikadong mga butang.

Matud ni Usop, gina-ablihan usab ang laing gate aron dili magdasok ang mga pasahero sa entrance area sa terminal diin dugang pwersa sa Task Force Davao ang mag-inspeksyon, samtang i-repair pa usab ang nadaut nga baggage x-ray machine.

“Ang ginahimo pud nato is pag taas na gyud pud kaayo ang linya or bisan og dili taas, ginapa-open nalang pud nato ang employees gate nato para diha pud makaagi ‘tong mga pasahero nga wala kaayoy dagko nga kargamento,” sulti ni Usop.

Nangayo og pagsabot ang DCOTT manager sa mga pasahero sa taas nga pila tungod lamang sa terminal-to-terminal nga biyahe mao ang pagsigurong luwas ang mga pasahero, human sa insidenteng pagpamomba sa usa ka bus sa Koronadal City, South Cotabato.

RadyoMaN Kirby Manzon