DCOTT naka-alerto human sa Koronadal bus bombing

Davao City – Naka-doble alerto karon ang Davao City Overland Transport Terminal (DCOTT) human sa natigayong pagbusikad sa usa ka bus sa Koronadal City, South Cotabato pasado alas 12:00 sa udto kagahapong adlawa (Mayo 26, 2022) diin kini padayon pang gina-imbestigahan sa awtoridad.

Sa interbyu sa DXDC RMN Davao kang Aiza Usop, manager sa DCOTT, gikumpirma niini nga dili gikan sa syudad sa Davao ang nahisgutang sakyanan.

Bisan pa man, gimandoan niini ang mga security forces sa terminal nga doblehon ang pagbantay pagsigurong malikayan ang susamang mga insidente.

“Despite of that, naghatag na ‘ta sa atoang instruction sa atoang mga security guard na dapat maging alerto. Atoa na pong gi-coordinate ang atoang mga Task Force Davao ug kining mga kapulisan nga anaa sa atong DCOTT terminal,” sulti ni Usop.

Gisiguro usab ni Usop, hugot ang paghiling sa mga bagahe nga isulod sa terminal pinaagi sa ginahimong inspeksyon sa entrance nga bahin.

Panawagan usab sa DCOTT manager sa mga pasahero sa pag-report sa mga kadudahang butang o indibidwal ug padayong suportahan ang Culture of Security campaign sa City Government of Davao nga “Kapag May Nakita, Dapat Magsalita”.

RadyoMaN Kirby Manzon