Davao City – Gipaniguro sa Davao City Overland Transport Terminal (DCOTT) nga kaya ma-akomodar ug dili maapektuhan ang byahe sa mga pasahero paingon sa Norte nga bahin sa Davao Region.
Kini human gi-serve adlaw’ng Martes ang preventive suspension order sa Land Transportation Franchising and Regulatory Board (LTFRB) ngadto sa 34 ka mga units sa Davao Metro Shuttle company diin kini napirmahan sa Tagum City sa makalaby’ng Lunes.
Sumala ni DCOTT manager Aisa Usop, dili peak season sa terminal karong semanaha busa gamay lang ang mga pasahero ug ma-akomodar kini sa mga nahibilin pang bus companies nga miembro sa Southern Mindanao Bus Operation Association (SMBOA).
“Aduna kitay Golden Valley (15-18 buses) nga naga ruta sa North, Bachelor Express ug DBOA nga adunay more or less 30 ka mga bus,” saysay niini.
Nasayran nga gipatuman ang 30-day preventive suspension ayha pa man ang gikatakdang hearing aron masuta kung kinahahanglan na ba i-suspinde kun i-revoke ang franchise sa Metro Shuttle Company subay usab sa disgrasya nga gikalambigitan sa usa ka bus niini diin pito ang patay ug kapin 30 ang na angol.
RadyoMaN Jason Amisola
