Davao City – Gitino karon ni Davao City Police Office (DCPO) OIC Spokesperson Police Chief Inspector Catherine Dela Ray nga dugay nang palisiya ang pagdili sa pag-solicit panahon sa kapaskohan sa mga ginsakpan sa nasudnong kapulisan.
Gitin-aw ni Dela Ray nga sukad pa kaniadto nakalatid na sa Code of Ethics sa PNP sama sa pagbawal ngadto kanila nga mangayo og pinaskuhan sa mga institusyon matag selebrasyon sa Pasko ug Bag-ong Tuig.
Matud ni Dela Ray, dili overacting ang pasidaan ni PNP Director-General Oscar Albayalde sa mga pulis labot sa paglikay sa pagpangayo ug pagdawat og regalo kun pinaskuhan gikan kang bisan kinsang indibidwal ug mga kumpanya.
Samtang walay nakitang problema ang tigpamaba sa dugang direktiba sa Chief PNP nga dili puwede sagulan og bino ang mga parties sa kapulisan ang kasaulogan sa Pasko ug andam nila kining sundon sa hingpit.
Hinoon wala na mudugang pa ang opisyal kung kanus-a ipatuman sa pamunuan sa DCPO ang duha ka mando ni Albayalde alang sa mga pulis sa dakbayan sa Dabaw.
RadyoMaN Joel Viray
