Davao City – Andam kanunay ang kapolisan batok sa bisan unsang pagpanghasi o atake sa mga kalaban sa estado.
Kini maoy tubag ni Davao City Police Office (DCPO) director P/Sr. Supt. Alexander Tagum sa panawagan ni Pres. Rodrigo Duterte sa kapolisan nga dili magkompyansa sa himoong pagpangataki sa mga rebelde.
Sumala ni Tagum, daan na niyang gipasidan-an ang iyang mga ginsakpan ilabina kadtong anaa sa lagyo nga mga police stations sama sa Marilog, Paquibato, Baguio ug Calinan nga dili molu-ag sa ilang pagbantay aron dili molampus sa pagpanghasi ang mga rebelde ug uban pang kalaban sa gobyerno.
Sa gihimong pagpamulong sa presidente sa inagurasyon sa bag-ong PNP Crime Laboratory Building sa Ecoland ning syudad, iyang gipasidan-an ang kapolisan ug sundalo nga dili magkompiyansa tungod kay dunay himoong pagpangatake ang mga rebelde sa nagkadaiyang dapit sa nasud.
RadyoMaN Bernard Pantallon
