Davao City – Nagpuyo gawas sa Davao City ang sagad nadakpan sa Davao City Police Office kun DCPO nga mga naaresto dinhi sa dakbayan tungod sa iligal nga droga.
Kini ang gibutyag ni DCPO spokesperson Police Captain Ma. Teresita Gaspan atol sa AFP-PNP Presser.
“Naa pa gyud (drug personalities) pero actually dili sila taga diri, mga transient lang siguro, diri lang ilang operation,” segun ni Gaspan.
Samtang gibutyag usab sa tigpamaba ang datos nga natala sa DCPO sukad gipatuman ang ‘Oplan Double Barrel: Reloaded’ niadtong December 2017 hangtod July 2019 diin miabot sa 1,708 ang arestado tungod sa iligal nga droga.
Dugang sa datos nga ang police station nga adunay pinakadaghang naaresto mao ang Sta. Ana police nga dunay 470 gisundan sa Bunawan nga adunay 301 ug ikatulo ang Talomo PNP nga dunay 215.
Samtang gikanayon ni Gaspan nga sa maong ihap, padayon ang ilang hugot nga kampanya batok sa iligal nga droga sama nalang sa pagpahigayon og nagkadaiyang aktibidad sama sa Oplan Kalinaw ug uban pa.
RadyoMaN Renz Barbarona
