Sa interview sa DXDC RMN Davao kang Police Captain Hazel Tuazon, ang tigpamaba sa DCPO, iyahang gibutyag nga wala misulti si Police Regional Office (PRO) XI Director PBGen. Nicolas Torre III na nagpinatyanay ang mga tawo sa dakbayan sukwahi sa post sa usa ka media outlet.
Gipasabot ni Tuazon nga ang nahitabong meeting niadtong June 28, 2024 sa kadlawon, usa ka maayong lakang tungod ilang nahisgutan ang peace and order situation. Atol sa maong virtual meeting, gipresenta nila ang focused crimes sulod sa lima ka buwan sa 2024.
Giawhag ni PBGen.Torre ang DCPO nga sutaon ug i-record og sakto ang natalang mga krimen aron dili mamantyahan ang reputasyon sa Davao City.
“Ang kato nga word, dili gyud siya direct gistorya sa atong regional director, I don’t know kung asa gikan na nga source. Giklaro sa RD nga ang kapulisan sa Davao City, kailangan mahimo nato ning 3-minute response time para makahatag ta og maayong serbisyo sa katawhan. Ug ang local government unit, naay full support sa mga programa sa Davao City Police Office,” sulti ni Tuazon.
Dugang ni Tuazon nga nagpadayon ilang SIMEX karon aron ma-practice ang giimplementang 3-minute response rule sa PRO XI.
RadyoMaN Ivy Parido
