Davao City – Gipaklaro sa Davao City Police Office kun DCPO nga magbase sa 1st digit sa control number sa Food and Medicine kun FM pass ang schedule nga gimugna aron makagawas sa ilang tagsa-tagsa ka mga panimalay.
Sa pakighinabi sa DXDC RMN Davao kang DCPO Spokesperson Police Captain Rosario Aguilar pinaagi sa messenger, gikumpirma niini nga dili color sa number sa FM pass ang basehan kun tan-awon sa otoridad kundi mao ang 1st number nga naa niini.
Subay kini sa daghang pangutana ug kalibog usab sa mga dabawenyo bahin sa pagpatuman sa FM Pass Number Coding diin usa na niini ang netizen nga si Tessie Dumandan nga nagcomment sa DXDC 621 RMN Davao FB Page alang sa pagpaklaro sa maong nahisgutan.
Ugmang adlawa, April 18, 2020, sugdan na ang pag implementar sa FM pass number coding sa Davao City diin ang mga pass nga dunay numerong nagsugod sa odd numbers 1, 3, 5, 7, 9 matugtang makagawas gamit ang FM PASS matag-Lunes, Miyerkules ug Biyernes samtang sa mga nagsugod sa even numbers 0, 2, 4, 6 matugtang makagawas gamit ang FM PASS matag-Martes, Hwebes ug Sabado.
Dugang niini, hugot gipahinumduman sa kapulisan nga walay makagawas gamit ang FM pass sa adlawng Dominggo.
RadyoMaN Renz Barbarona
