DCPO Director PCOL. Marantan, paserbisyuhon ni Mayor Baste sa dakbayan taliwala sa gituohang manipulasyon sa panggamhanan

Davao City – Gihatagan og higayon ni Mayor Sebastian ‘Baste’ Duterte si Davao City Police Office (DCPO) Acting Director PCol. Hansel Marantan nga muserbisyo ug mutrabaho sa dakbayan bisan og wala gikonsulta kaniya ang paglingkod sa bag-ong hepe.

Sa media interview kang Baste atol sa State of the City Address (SOCA) gahapon, August 6, 2024, gibutyag ni Baste nga gimanipula sa kasamtangang administrasyon ang syudad nga makita karon sa kagubot sa hut-ong sa kapulisan.

Apan bisan pa man, namasin ang mayor nga adunay tinguha si Marantan sa Davao City ilabi na sa peace and order nga mao karon ang iyang gihuptang paglaum nga basin og tinud-anay ang trabaho sa opisyal nga gawasnon gikan sa sugo sa taas.

“Dili ko ganahan mu-conclude ba, tawo raman na siya. Medyo unusual man gyud ang sitwasyon karon tungod sa pulitika. Paminaw nako grabeng manipulation sa administration. Pero basig diay mutrabaho gyud siya. Basig wala lang pud siyay mahimo kay basig tanggalon. Pero huwat ta, total kung dili na maayo ang dagan, diha na nako siya singlon sa iyang pagpanarbaho,” segun ni Baste.

Sa katapusan, giawhag sa mayor ang dabawenyos nga magpabiling lig-on bisan paman sa giatubang karong mga kontrobersiya ug gipanaad niya nga magpabilin ang iyang pagpaningkamot alang sa Davao City.

RadyoMaN Ivy Parido